Seanca plenare në Kuvend u shoqërua me tensione të forta mes mazhorancës dhe opozitës, ku në qendër të debatit ishte raporti i ekspertëve për Reformën Territoriale.
Përplasjet nisën pasi opozita kërkoi shtyrjen me tre muaj të afatit të punës së komisionit për Reformën Territoriale, kërkesë që u kundërshtua nga mazhoranca.
Debatet u përshkallëzuan, ndërsa deputetët e Partisë Demokratike bllokuan foltoren e Kuvendit, duke shkaktuar kaos në sallë dhe detyruar drejtuesin e seancës të ndërpriste punimet për pesë minuta.
Gjatë seancës ishte i pranishëm edhe Edi Rama, i cili rikthehej në sallën e Kuvendit pas një mungese të gjatë. Ndërkohë, kreu i grupit parlamentar të Partisë Socialiste, Taulant Balla, kërkoi që procedura të kalonte menjëherë në votim, pa vijuar diskutimet.
Pas rifillimit të seancës, kryetari i Kuvendit, Niko Peleshi, e kaloi çështjen direkt në votim. Raporti i ekspertëve, i hartuar nga bashkëkryetari i komisionit për Reformën Territoriale, Arbion Mazniku, u miratua me 84 vota pro të deputetëve të mazhorancës.
Opozita nuk mori pjesë në procesin e votimit dhe vijoi protestën në sallë. Kryetari i grupit parlamentar të Partisë Demokratike, Gazment Bardhi, është përjashtuar nga seanca plenare, pasi ka lagur me ujë Kryeministrin Rama.
Deputetët e opozitës bllokuan foltoren teksa votoheshin projektligjet e rendit të ditës dhe në një moment ata nisën të hidhnin ujë në drejtim të Ramës, duke e lagur.
Për këtë veprim, kryetari i Kuvendit, Niko Peleshi, përjashtoi Bardhin nga seanca. Megjithatë ai vijoi të qëndrojë në sallë, teksa ligjet votohen njëri pas tjetrit.
