Pas fjalimit të fundit në protestën në Slavija, protestuesit hoqën jelekët dhe bënë thirrje për dhunë totale.
Fjalët e fundit të tyre: “Ne besojmë tek ju, ju keni dritën jeshile”. Fjalët e tyre të fundit ishin se kjo nuk është më një protestë studentore dhe se “drita jeshile” është dhënë.
Policia serbe u përlesh të shtunën në mbrëmje me protestuesit antiqeveritarë që kërkonin zgjedhje të parakohshme dhe fundin e sundimit 12-vjeçar të Presidentit Aleksandar Vuçiç.
Protestuesit bërtitën: “Mbajini mburojat poshtë”, duke i bërë thirrje policisë të ndalonte ndërhyrjen.
Kundërshtarët e Vuçiçit e akuzojnë atë dhe aleatët e tij për lidhje me krimin e organizuar, dhunë kundër rivalëve dhe kufizim të lirive të medias, diçka që ata e mohojnë.
Muaj të tërë protestash në të gjithë vendin, përfshirë mbylljen e universiteteve, e kanë tronditur Vuçiçin, një populist, mandati i dytë i të cilit përfundon në vitin 2027, kur janë planifikuar edhe zgjedhjet parlamentare.
Të shtunën, Vuçiç tha se pas protestës qëndronin “fuqi të huaja” të paspecifikuara. Ai tha se policia duhet të jetë e përmbajtur, por paralajmëroi se dhuna nuk do të tolerohet.
“Vendi do të mbrohet dhe banditët do të përballen me drejtësinë”, u tha ai gazetarëve në Beograd.
Sladjana Lojanovic, 37 vjeç, një fermere nga qyteti Sid në veri, tha se erdhi për të mbështetur studentët.
“Institucionet janë uzurpuar dhe… ka shumë korrupsion. Zgjedhjet janë zgjidhja, por nuk mendoj se ai (Vuçiç) do të dëshirojë të largohet në mënyrë paqësore”, tha ajo për Reuters.
Në ditët përpara protestës, policia arrestoi rreth një duzinë aktivistësh antiqeveritarë, duke i akuzuar ata për minimizimin e kushtetutës dhe terrorizëm. Të gjithë i mohuan akuzat.
Protestat nga studentët, opozita, mësuesit, punëtorët dhe fermerët filluan dhjetorin e kaluar pasi 16 persona vdiqën më 1 nëntor në shembjen e çatisë së stacionit hekurudhor të Novi Sadit. Protestuesit fajësojnë korrupsionin për katastrofën.
Tubimi në Beograd përkon me Ditën e Shën Vitusit, e cila nderohet nga shumica e serbëve, e cila shënon Betejën e Kosovës të vitit 1389 me turqit osmanë.
Ministri i Brendshëm serb, Ivica Daçiç, i ka dënuar ashpër “sulmet e pjesëmarrësve në marshin në sheshin Sllavija ndaj pjesëtarëve të Ministrisë së Brendshme”.
Ai ka thënë se do t’i ndërmarrë të gjitha masat për të rikthyer rendin publik dhe që të gjithë ata që e kanë sulmuar policinë do të ndiqen penalisht.
Vetë Vuçiç e ka publikuar një video – para se të shpërthente dhuna – nga Parku i Pionierëve, ku janë mbledhur studentët pro tij, duke thënë se “bllokuesit humbën”.
“Studentët fituan, bllokuesit humbën. Krenar me këta të rinj”, ka shkruar presidenti serb në Instagram.
Sipas tij, në protestën e së shtunës ka pasur tre herë më pak njerëz sesa më 15 mars, kur është mbajtur një protestë masive.
Sipas Vuçiçit, studentët do të kthehen në universitete dhe i ka falënderuar ata që i kundërshtojnë bllokadat.
Studentët i bëjnë përgjegjëse institucionet për shembjen e një strehe në stacionin hekurudhor të Novi Sadit në nëntorin e vitit të kaluar, që ka rezultuar me vdekjen e 16 personave, prandaj po kërkojnë nga Qeveria që t’i dërgojë presidentit Vuçiq një propozim për shpërndarje të parlamentit dhe shpallje të zgjedhjeve të reja.
Kërkesa e dytë është ndërprerja e tubimit të mbështetësve të Qeverisë, të cilët deklarojnë se duan të mësojnë. Ata u kanë thënë ultimatum autoriteteve deri në orën 21:00 të së shtunës që t’ua plotësojnë kërkesat.
Mirëpo, Vuçiç ka thënë më 27 qershor se “ultimatumi nuk është pranuar”.
Disa ditë më parë, autoritetet i kanë arrestuar gjashtë persona për përgatitje të “përmbysjes së dhunshme të rendit kushtetutës”. Autoritetet i akuzojnë organizatorët e protestës se janë “duke u përgatitur për dhunë”.
Studentët, në anën tjetër, kanë deklaruar se me veprimet e tyre deri tani kanë treguar se janë kundër çdo forme të dhunës.
