Voicenews.al nuk është marrë me proceset brenda partive politike PD-PS, duke pasur bindjen se brenda tyre nuk ka demokraci, por nuk është marrë as me talljen që hera herës i bëhet këtyre proceseve. Gjithasesi pas përjashtimit nga gara për kreun e PD-së, Mereme Sela nuk rezultoi një individ sa për të kaluar radhën, por një koçkë e fortë që pritet ti sjellë kokëçarje Sali Berishës. Sela sikurse kishte lajmëruar, (por asnjë nuk e mori seriozisht) do ta vijojë përballjen me Sali Berishën për të marrë drejtimin e PD në Gjykatën e Shkallës së Parë të Tiranës.
Sela ka paditur Partinë Demokratike me argumentin se u përjashtua nga gara me një vendim të paarsyetuar, të pamotivuar dhe në mungesë transparence procedurale. Sela thotë se përjashtimi është bërë “në shkelje të drejtpërdrejtë të të drejtave të saj statutore dhe parimit të barazisë në konkurrim.”
Në padi po ashtu thuhet se organet e partisë kanë lejuar kandidimin e Sali Berishës, në kundërshtim flagrant me ndalimin e parashikuar në statut, pasi neni “Basha” (neni 46) sanksionon se kryetari që humb zgjedhjet duhet të largohet nga drejtimi i partisë.
Mereme Sela i është drejtuar gjykatës me 5 kërkesa:
1. Shpallja e pavlefshme absolute e vendimit për skualifikimin e paditëses nga gara për Kryetar të PDSH-së;
2. Detyrimi i palës së paditur për rikthimin e paditëses në garë;
3. Shpallja e pavlefshme absolute e kandidimit të Sali Berisha;
4. Konstatimi i shkeljes së rëndë të statutit dhe parimeve të demokracisë së brendshme;
5. Vendosja e masës së sigurimit të padisë: pezullimi i menjëhershëm i procesit zgjedhor të datës 23.05.2026 deri në përfundim të gjykimit.
