Në Kuadër të Ditës Ndërkombëtare të Shkopit të Bardhë, Shoqata e të Verbërve ka organizuar një protestë, duke ngritur zërin për mungesën e ndihmës nga institucionet.
Referuar deklarimeve të përfaqësuesve të shoqatës, kjo situatë ka sjellë përjashtimin e personave me aftësi të kufizuara në shikim nga mundësitë e barabarta në arsim, punësim dhe për një jetë të pavarur.
Përmes një letre drejtuar institucioneve, Shoqata kërkon rikthimin e shërbimeve publike për të verbërit, rritjen e asistencave sociale, të cilat nuk janë rritur që nga viti 2009, si dhe mbështetjen për integrimin e tyre në tregun e punës me paga minimale.
