Talenti nga Kosova, Erblin Osmani, ka realizuar ëndrrën e tij duke debutuar me ekipin e parë të Bayern Munich në Bundesliga.
Gjatë fitores bindëse 4-0 ndaj Union Berlinit, mesfushori shqiptar i akademisë bavareze u fut në lojë në minutën e 87-të, duke zëvendësuar Leon Goretzkan.
Osmani, i cili shkëlqen me ekipet U17 dhe U19, ishte ftuar nga trajneri Vincent Kompany pas performancave të shkëlqyera në stërvitjet me grupin kryesor.
Golat e Olise, Kane dhe Gnabry kishin siguruar fitoren për “Bavarezët” përpara se djaloshi shqiptar të shkelte fushën.
Me këtë sukses, Bayerni shkon në kuotën e 70 pikëve, duke u shkëputur me 12 pikë nga Dortmundi i vendit të dytë.
Ky debutim konfirmon politikën e suksesshme të klubit për promovimin e elementëve të rinj nga akademia. Për Osmanin, ky është vetëm fillimi i një karriere që pritet të jetë mjaft premtuese në elitën e futbollit evropian.
