Kryeministri Edi Rama duke iu përgjigjur një komenti në rubrikën “Sy m’ Sy”, Rama tha se “patronazhistët” e PS-së janë në “super formë këtë vit” dhe se u pëlqen shumë kjo punë dhe janë qeliza të PS. Më tej kreu i PS ironizoi me fjalët se mos t’i ngacmojnë patronazhistët, se motivohen më shumë.
“Patronazhistët i kemi në super formë këtë vit. Patronazhimin e kemi ngritur në nivel tjetër. U kam thënë atyre që i shajnë, mos i ngacmoni se motivohen më shumë. Janë ambiciozë të mëdhenj dhe janë shumë të fokusuar te kjo punë. U pëlqen shumë kjo punë dhe janë qeliza të PS. Kush nuk është në PS nuk u vë faj që nuk e kuptoni”, u shpreh ai.
Po ashtu ai ka ironizuar Sali Berishën dhe PD sa i takon çështjes së negociatave. Rama tha se BE nuk i merr në konsideratë njerëzit që kanë probleme me drejtësinë, ndërsa me ironi komentoi edhe marrjen e LaCivita si këshilltar i PD për fushatën zgjedhore.
“Do jetë rekord historik, jo sepse në jemi ndryshe, nga të tjerët. Jemi ndryshe në disa gjëra, por jo vetëm për këtë, por sepse BE është shumë i interesuar të na marrë neve brenda në këtë moment. Pse nuk është kaq brutale kjo që thuhet se ç’rëndësi ka se kush fiton këtu. Kjo nuk ndodh sepse e para, kjo është çështje e kohës, është çështje e mos humbjes së asnjë minuti se kalendari është shumë i ngjeshur dhe mjafton një lëkundje. Këtë bëhet fjalë me individë që kanë probleme të hapur me drejtësinë, si mendoni ju që BE këto nuk i merr në konsideratë, apo është një studio konsulence që paguhet me kushedi se sa dhe se si paguhet dhe vjen nga Amerika këtu se paguhet dhe bën fushatë për një palë dhe këtu mbyllet filmi. Nuk mbyllen kështu filmat me BE, janë ndryshe. As me Amerikën. Është interesant se si gjithë këto vite dhe një pjesë e këtyre që u rritën në kënetën mediatike, nuk e mësuan akoma, ose bëjnë sikur nuk e kanë mësuar si funksionon BE dhe si funksionon Amerika”, tha Rama.
