Një shqiptar ka arritur të arratiset nga burgu “Dozza” në Bolonja të Italisë, duke përfituar nga pakujdesia e gardianëve të burgut. Bëhet fjalë për 34-vjeçarin Fatbardh Mneraj, i cili ishte dënuar për grabitje.
Mediat në Itali raportojnë se Mneraj kishte përfituar nga regjimi i gjysmëlirisë, që iu lejon të burgosurve të punojnë ose të marrin pjesë në aktivitete të ndryshme edukative.
Gjatë transferimit nga seksioni i gjysmë-lirisë, në seksionin e brëndshëm të burgut, 34-vjeçari dyshohet se ka përfituar nga një derë e lënë hapur dhe nga një polic që nuk e kishte mëndjen, për t’u zhdukur pa gjurmë. Seksioni për të burgosurit gjysmë të lirë është brenda oborrit të Dozza-s, por është i ndarë nga ndërtesa ku ndodhet burgu aktual.
Kërkimi vijon dhe Policia e Burgjeve ka publikuar fotot dhe të dhënat personale të të burgosurit të arratisur në të gjitha organet e rendit në Itali.
Çfarë është regjimi i gjysmëlirisë?
Është një nga përfitimet e parashikuara për të burgosurit që vendoset nga Gjykata. I dënuari lejohet të kalojë një pjesë ose të gjithë ditën jashtë burgut për të marrë pjesë në aktivitete pune, edukative ose riintegrimi shoqëror. Për t’u pranuar në këtë regjim, i burgosuri duhet të ketë kryer të paktën gjysmën e dënimit kur dënimi i shqiptuar është më i gjatë se gjashtë muaj.
