Ministri i Jashtëm rus Sergei Lavrov dhe Sekretari amerikan i Shtetit Marco Rubio zhvilluan një telefonatë sot ku u ra dakord për të pasur kontakte të rregullta për t’u përgatitur për një takim midis presidentit rus Vladimir Putin dhe presidentit të SHBA Donald Trump, tha Ministria e Jashtme e Rusisë.
“Të dyja palët shprehën vullnetin e tyre për të bashkëpunuar në çështjet urgjente ndërkombëtare, duke përfshirë zgjidhjen e konfliktit me Ukrainën, situatën rreth Palestinës dhe në përgjithësi në Lindjen e Mesme”, tha Ministria e Jashtme ruse në një deklaratë.
“Sergei Lavrov dhe Marco Rubio riafirmuan gatishmërinë e tyre për të punuar së bashku për të rikthyer dialogun mes dy shteteve në përputhje me tonin e vendosur nga dy presidentët”, shkruhet në përfundim të deklaratës.
Trump dhe Putin folën për më shumë se një orë të mërkurën, kontakti i parë i drejtpërdrejtë midis presidentit amerikan dhe rus që nga telefonata e Putin me Joe Biden pak përpara se të dërgonte dhjetëra mijëra trupa në ndihmë të Ukrainës në shkurt të vitit 2022.
SHBA formon ekipin negociues për bisedime me Rusinë
Këshilltari për sigurinë kombëtare, Mike Waltz, Sekretari i Shtetit, Marco Rubio dhe i dërguari për Lindjen e Mesme, Steve Witkoff pritet të udhëtojnë drejt Arabisë Saudite për një takim me zyrtarë të lartë rusë, sipas CNN.
Burimet nuk pranuan të thonë se cilët zyrtarë rusë do të ishin të pranishëm, por CNN raporton se Kremlini është duke mbledhur një ekip zyrtarësh të nivelit të lartë për t’u angazhuar në bisedime të drejtpërdrejta me SHBA-në, duke përfshirë figura të nivelit të lartë politik.
Presidenti Donald Trump tha në fillim të kësaj jave se ai mund të takohet me presidentin rus Vladimir Putin në Arabinë Saudite në një të ardhmen jo shumë të largët.
