Makthi për ish-kryetarin e Bashkisë së Himarës, Jorgo Goro nuk ka të sosur, SPAK e akuzon për “shpërdorim detyre” me procedurat e marrjes së tokës nga familjet bujqësore, së bashku me dy vartës të tij.
Prokuroria e Posaçme Kundër Korrupsionit dhe Krimit të Organizuar, zyrtarizoi paraqitjen e kërkesës për dërgimin në gjykim të një çështje penale të dytë në ngarkim të ish-kryetarit të Bashkisë së Himarës, dhe ndaj dy vartësve të tij, të akuzuar për shpërdorim detyre.
Në shtator të vitit të kaluar, ai u dërgua për gjykim si pjesë e një skeme tjetërsimi pronash në bregdet nëpërmjet dokumenteve të falsifikuara, përmes miratimit të kalimit të një toke shtet në pronësi fundore të ish-deputetit të PS Artan Gaçit, i shpallur investitor strategjik nga qeveria “Rama”.
Në këtë hetim të dytë, Goro akuzohet se ka kryer veprime të kundraligjshme në cilësinë e kreut të Bashkisë së Himarës lidhur me procedurat e plotësimit të akteve të marrjes së tokës bujqësore në pronësi për familjet bujqësore, në dëm të disa shtetasve, banues në Bashkinë Himarë.
Goro gjendet në burg prej marsit të vitit të kaluar, kur u arrestua për tokën ku burri ish-ministres së Ramës, do të ndërtonte një hotel. Gjykata e Posaçme e Apelit vendosi në korrik 2024 të pranojë kërkesën e SPAK për vendosjen e skuestros preventive mbi një apartament të Jorgo Goros, duke rrëzuar vendimarrjen e Shkallës së Parë që refuzoi ta sekuestronte atë pasuri.
